مسلسل اقتلني اشفيني kill me heal me
هو واحد من المسلسلات الكورية ذائعة الصيت..من بطولة سي جون .. والمعروف انه مبيعملش حاجه وحشه، ويعتبر تذكرة وصوله لأنه يصبح واحد من أهم الممثلين الكوريين في عصرنا الحالي.
فكره المسلسل بتدور حول مرض تعدد الشخصيات و المعروف مجازا بالأزدواج في الشخصية، لكن المسلسل هنا ما شاء الله خلاهم سبعة.
أيون 7 شخصيات بيتنقل بينهم سي جون، بشكل ناعم وسلس .. والمفاجأة أن فيه شخصيات نسائية .. في محاولة لإضافة لمحة كوميدية إلا أنه ماكنش أحسن حاجه في رأيي .
سي جون فعلا كان اداؤه مميز في التنقل بين الشخصيات، لكن بشكل عام …ولأنه مسلسل يعتبر قديم شويه.. الأداء كان فيه شوية أفوره خصوصا من البطلة، والإخراج مكنش أحسن حاجه، إلا أنه في المجمل مسلسل مميز في وقته.. لكن في اعتقادي لو اتعمل اليومين دول بعد تطور الدراما الكورية، كان حيبقى أفضل بكثير.
وده بيؤكد وجهة نظري إن الدارما الكوريه اتقدمت واتطورت كثير بجد في فتره صغيره.. وبيحاولوا طول الوقت يعدلوا من نفسهم.
يعني كان دايما التعليقات عليهم إن ادائهم التمثيلي واقف ومفيش مشاعر، ظهر بعد كده العديد من الممثلين المبدعين في التمثيل، كمان دايما البطلة تتشال على الظهر، قل الموضوع جدا، وكانت الأبطال البنات دايما يحطوا توكه في قصة شعرها .. بطلوا بردوا الشكل ده. كان في زعيق وصريخ كثير .. وعياط البنات بزن ومفتعل ذي الأطفال .. أصبحوا بيعيطوا طبيعي
يعني في ظرف 5 سنين لو انت من متابعي الدراما الكورية وبتركز في التفاصيل، حتلاقيهم تطوروا بشكل كبير وسريع .
لأن 5 سنين تعتبر فترة قليله اوي عشان تغير من فكر وثقافة صناعة كبيره زي صناعة السينما والدراما.
صحيح لسه في حاجات تانية لسه محتاجين يعدلوها .. بس لازم ناخد في بالنا إن الدراما الكوريا هي حالة مختلفة بطريقتهم وأفكارهم والفانتازيا بتاعتهم، تتقابلها بشكلها واسلوبها لان الإختلاف هو ما يميزهم.
وأخيرا .. في رأيك إيه أحسن مسلسلات لسي جون؟
مسلسل اقتلني اشفيني kill me heal me
البلد المنتج : كوريا الجنوبية
النوع :رومانسي – غموض – كوميدي
عدد الحلقات : 20 حلقة
سنة العرض: 2015
